Minister leh Speaker te Bangla cheithat nan nuai 27 leh singli hmang

by News Editor

Tualchhung News

ZORAM TODAY| 26th July, 2024 (Fri): Minister pahnih leh Assembly Speaker leh Deputy Speaker bungalow cheiṭhat nan maintenance of government building funds aṭangin nuai 27 leh sing li an hmang.

RTI Act, 2005 zawhna Public Works Department (PWD), Building Division Sr. Executive Engineer in a chhan danin tun sorkar tharah minister bungalow pahnih- Health minister Lalrinpuii chenna cheiṭhat nan ₹. 750,000 leh LAD minister Lalsawivunga awmna cheiṭhat nan ₹. 500,000 hman ral a ni.

Hetihrual hian Assembly speaker Lalbiakzama bungalow cheiṭhat nan ₹. 840,000 leh Deputy speaker Lalfamkima bungalow cheiṭhat nan ₹. 650,000 hman ral a ni a, an pali te bungalow thuamṭhat nan a vaiin ₹. 27,40,000 an seng ral.

Chief Minister atana Lalduhoma lakluh a nih a, chanchinbu mite a kawmna hmasa berah an sorkarah minister ten bunglow an luahin cheithat an tum loh thu a lo sawi tawh a.

“Heng bungalow te hi minister te’n lungawi taka an luah mek a ni a, furnishing hi tih ṭul kan ti lo, a awm ang ang hian kan chhâwm ang,” a lo ti tawh a ni.